Солтүстік Қазақстан облысында үш адамның жұмбақ өліміне байланысты тергеу жүргізіліп жатыр, – деп хабарлайды Aikyn.kz сайты КТК телеарнасына сілтеме жасап.
Полтавка ауылындағы өртеніп кеткен үйдің орнынан үй иесі мен екі ер адамның мәйіті табылды. Тек қаза тапқан әйелдің қызы ғана аман қалған.
Өрт Полтавканың шетінде кешкісін тұтанған. 13 шақырым жердегі өрт сөндіру бөлімінен жеткен кезде үйді ашық жалын шарпып тұрған. Қираған үйдің орнынан 58 жастағы үй иесінің және 44 пен 46 жастағы екі ер адамның мәйіті табылды.
Белгілі болғандай, ер адамдардың бірі оқиға кезінде қонақта болған, ал екіншісі – әйелдің күйеу баласы екен. Өрт кезінде 35 жастағы әйел үйден шығып үлгерген.
Ауыл тұрғындары бұл әулетті тату, үлгілі отбасы ретінде сипаттайды. Екі ер адам да жергілікті ЖШС-де жұмыс істеген. Үй иесі үй шаруасымен айналысқан.
Солтүстік Қазақстан облысы тергеу басқармасының басшысы Азат Құсаиновтың мәліметінше, үшеуі қылмыстың құрбаны болуы мүмкін.
“Аталған дерек бойынша Қылмыстық кодекстің 99-бабы 2-бөлігінің 1-тармағы (Екі немесе одан да көп адамды өлтіру) бойынша сотқа дейінгі тергеу басталды. Қажетті тергеу амалдары жүргізіліп, бірқатар сот-медициналық сараптамалар тағайындалды”, – деді Азат Құсаинов.
