Соңғы кезде үй нарығындағы жағдай өзгерген. Жалпы, республика бойынша ескі үйлер 5,3%-ға қымбаттаған, – деп хабарлайды Аikyn.kz. Бұл туралы Aiqyn басылымы “Тұрғын үйдің бағасын «тұсаулау» кімге тиімді?” мақаласында жазды.
Басылым нарықтың аса қатты өзгермегенін айтса да, ескі үйдің бағасы өскенін жеткізді. Сарапшының айтуынша, сатушылар ақша құнсызданбауы үшін бағаны көтеруге мәжбүр.
– Өйткені жаңа тұрғын үйлердің бағасы өсіп, инфляция баяуламай тұр, ал 2026 жылдан бастап ҚҚС мөлшері 16 %-ға дейін көтеріледі. Алайда сұраныс төмендеп келеді, бұл пәтер иелерінің «тәбетін» тежейді. Сондықтан нарық икемдірек бола бастады: сатушылар нақты сатып алушыларға жақсы жеңілдіктер жасауға дайын. Ал мамырмен салыстырғанда маусым айында бағаның өсуі баяулағаны маусымдық құбылыс. Сондай-ақ сатып алу белсенділігінің төмен болуына байланысты бағаның уақытша түзетілуі деп қабылдауға болады. Қазақстан аумағы бойынша баға орта есеппен +0.5 % ғана өскен. Қалалардағы өзгерістер бағаның өсуі де, төмендеуі де аса айтарлықтай емес», – дейді Krisha.kz жылжымайтын мүлік порталының сарапшысы Инна Пчелянская.
2025 жылдың маусым айында Астанадағы пәтер бағаларына көз жүгіртсек, жаңа үйлердегі пәтерлер, яғни бірінші нарықтағы бағалар әлдеқайда қолжетімді. Мысалы, танымал тұрғын үй бір бөлмелі пәтердің орташа бағасы шамамен 14 миллион теңге. Мұндай пәтерлер әдетте шағын – 38-42 шаршы метр шамасында. Екі бөлмелі жаңа пәтерді шамамен 19,5 миллион теңгеге, ал үш бөлмелі пәтерді 38-39 миллион теңге көлемінде сатып алуға болады.
Екінші нарықтағы, яғни бұрын пайдаланылған пәтерлердің бағасы бұлармен салыстырғанда едәуір жоғары. Бұл пәтерлердің 1 шаршы метрі орта есеппен 528 мың теңге тұрады.