Жоба қазақ-қытай кәсіпорындарының бірлескен консорциумы негізінде биылғы тамыз айында басталып, 2028 жылға дейін жүзеге асырылады. Бұл – Абай облысындағы маңызды инвестициялық жобалардың бірі.
Аталған бастама Қазақстан Республикасының 2030 жылға дейінгі көлік-логистикалық әлеуетін дамыту тұжырымдамасы шеңберінде халықаралық қаржы институттарымен бірлесіп іске асырылатын ерекше маңызы бар жобалар тізбесіне енгізілген. Жаңа айналма жолдың салынуы облыстың логистикалық әлеуетін арттырып, тоғыз жолдың торабындағы Семей қаласының көлік жүктемесін азайтуға мүмкіндік береді. Облыс орталығындағы аспалы көпір арқылы жылына 700 мыңға жуық көлік өтеді.
Аймақ басшысы облыс тұрғындары үшін аса маңызды жобаның тиісті жұмыстары басталып та кеткенін атап өтті.
«Қазақ-қытай кәсіпорындарының бірлескен консорциумы негізінде қол қойылған келісімге сай биыл тамыз-қыркүйек айларында жобаның техникалық-экономикалық негіздемесі жасалады. Ал қазан, қараша айларында айналма жолдың алдын ала жобасы әзірленіп, көпірлер мен жолайрықтары әкімдікпен келісіледі. Қараша, желтоқсан айларында жұмыс жоспары, құрылысқа дайындық әкімдікпен келісіледі. Содан кейін барып Семей қаласын айналып өтетін автожол құрылысы басталады. Бұл келісім біздің елдер арасындағы ұзақмерзімді әрі өзара тиімді ынтымақтастықтың негізіне айналып, Еуразиядағы халықаралық көлік дәліздерінің дамуына айтарлықтай үлес қосатынына сенімдімін», – деді облыс әкімі.
Қытайлық компания өкілдері жұмысты бастауға дайын екенін жеткізді.
«Екі ел достығының арқасында жүзеге асқан Астана қаласындағы LRT құрылысына қатысып жатырмыз. Біздің компания бұл жобаға былтырдан бастап араласып, бірқатар жақсы нәтижеге қол жеткіздік. Осы тәжірибемізді Семей қаласындағы айналма жол құрылысы кезінде іске асырамыз деп ойлаймын», – деді Чжоу Хайвэй.
Аспалы көпірге асфальт төселді
Семейдегі Ертіс өзені арқылы өтетін аспалы көпірдің сол жағалаудан оң жағалауға бағытталған бөлігіндегі жолға асфальт төсеу жұмыстары толық аяқталды. Ескі асфальт, гидрооқшаулағыш қабаттар алынып, жаңа гидрооқшаулағыш материал және жаңа асфальтбетон жамылғысы төселді.
Аймақ басшысы жөндеу жұмыстарының сапасын бақылап, көпірдің асфальт төселген бөлігінде қозғалысты жылдамдатып ашуды тапсырды.
Облыс әкімі Семей қалалық Полиция басқармасына көлік өткелінде қозғалыс қауіпсіздігін қамтамасыз ету және көпірдің конструкциялық элементтерін сақтау мақсатында салмағы 8 тоннадан асатын көлік құралдарының қозғалысына шектеу қою қажеттігін айтты. Бұл үшін көпірдің екі жақ шетіне бекеттер қойылады.
«Біз жолаушыларға қолайлы болсын деп көпірдің үстіндегі жолды ғана емес, көпірге дейінгі 600 метр жол учаскесіне асфальт төседік. Осындай техникалық шешім қабылдадық. Жұмыстың межелі мерзімнен кешігуінің себебі – осы. Бұған тұрғындар түсіністікпен қарайды деп ойлаймыз», – деді аймақ басшысы.
Аспалы көпірдің жалпы ұзындығы 1 100 метрді құрайды. Оның ішінде аспалы аралық – 750 метр, бетонды аралық – 350 метр. Ені – 26 метр. Асфальтты ауыстыру жұмыстарына 80-ге жуық жұмысшы мен 20-дан астам арнайы техника жұмылдырылған.
50-ден астам көше жөнделеді
Биыл Семей қаласында 50-ден астам көшеде орташа жөндеу жұмыстары жүргізіліп жатыр. Жөнделетін жолдардың жалпы ұзындығы – 43 шақырым.Жол жөндеуші «Гордорстрой» ЖШС мекемесі қаладағы 9 көшені орташа жөндеу жұмыстарына қатысуда.
«Қазір Юность кентінде 3 көшені асфальттап жатырмыз. Өздеріңіз көріп тұрған көшенің 800 метр болатын учаскесіне 6 сантиметр қалыңдықта бірінші қабат асфальт төселді. Жақын күндері қосымша тағы бір қабат жамылғы төсейміз. Жұмысты белгіленген мерзімде, сапалы жүргізіп жатырмыз», – деді «Гордорстрой» ЖШС директоры Бауыржан Қайрамбаев.
Аймақ басшысы мердігерлерге жұмысты сапалы әрі уақытылы аяқтауды тапсырды.
«Биыл Семей қаласында 52 көшені жөндеуді жоспарлап отырмыз. Соның 36-сы бұрын-соңды асфальт төселмеген көшелер. Келер жылы осындай көшелердің санын екі есеге көбейтеміз. Бұл бағыттағы жұмыстар алдағы екі-үш жылда кезең-кезеңімен жүзеге асатын болады», – деді облыс әкімі.
35 жыл жөндеу көрмеген жылу желісі жаңарды
Семейдегі жылу желілері, жылу қазандықтары мен аулаларда қарқынды жұмыстар жүргізіліп жатыр. Мәселен, Жамақаев көшесіндегі жылу трассасын қайта жаңартылуда. Бұл жоба аясында ұзындығы 1,8 шақырым болатын 1988 жылдан бері жөндеу көрмеген ескі жылу желілері толық жаңартылады. Құбыр диаметрі 530 мм-ден 630 мм-ге дейін ұлғайтылады. Жоба іске асқанда қаладағы жылу жүйелерінің тозу деңгейі 1,4 пайызға төмендейді. Жоба екі кезеңнен тұрады. Қазір жұмыстың 77 пайызы орындалған. Былтыр 1,05 шақырым (58%) жылу желісі салынған. Биыл жыл басынан бері 400 метр құбыр төселген. Мердігерлер облыс әкіміне жұмысты мерзімінен бұрын аяқтап, бірден абаттандыру жұмыстарына кірісетінін жеткізді.
Аймақ басшысы мердігерлерге жұмысты уақытылы әрі сапалы аяқтауды тапсырды.
«Жұмысты жүргізгенде бұрын жасалған ойын алаңдарына зақым келтірмей, жылу желісінің жанынан өткізгендеріңіз дұрыс шешім болған екен. Бұл жылу желісінің ауыстырылмағанына 35 жылдан асыпты. Мұндағы жұмысты жылу маусымы басталғанға дейін аяқтап, пайдалануға беру керек», – деді облыс әкімі.
Семей қаласында орталықтандырылған жылумен қамтамасыз ететін 19 жылу қазандығы мен 1 жылу электр орталығы бар. Биыл облыс орталығындағы жылу желілерін жаңғырту бойынша 6 жоба іске асырылуда.
Өрт сөндіру депосы салынып жатыр
Семей қаласындағы Комсомол кентінде салынып жатқан әмбебап өрт сөндіру депосының құрылысы да қарқынды жүріп жатыр. Өрт сөндіру депосында 6 арнайы техникаға орын қарастырылған. Нысанның жалпы ауданы – 0,82 гектар. Құрылыс «Демеу Қазақстан қоры» корпоративтік қоры есебінен қаржыландырылып отыр. Жобаның жалпы құны – 700 миллион теңге. Құрылыс жұмыстары сәуірде басталған. Аяқталуы осы жылдың үшінші тоқсанының соңына жоспарланып отыр.
Жоба аясында заманауи инфрақұрылым қалыптастырылады. Модульдік негізде салынатын фитнес-зал ішінде спортпен шұғылдануға арналған зал, санитарлық бөлмелер және техникалық орынжайлар қарастырылған. Сонымен қатар 11 бөлмеден тұратын екі қабатты апартамент те модульдік құрылымда тұрғызылады. Онда өрт сөндіруші мамандарға қажетті барлық тұрмыстық және қосалқы жайлар қамтылады. Ішкі аумақта қызметкерлер мен апартамент тұрғындарына арналған спорт алаңдары, футбол алаңы мен жаттығу мұнарасы орналастырылмақ.
Қазір Абай облысында 70 өрт сөндіру бекеті жұмыс істейді. Оның 11-і жыл бойы тұрақты режимде қызмет етеді. Биыл «Ауыл құтқарушылары» бағдарламасы аясында Бесқарағай ауданында өрт сөндіру бекеті ашылды.
«Жақында Мақаншы ауданындағы Алакөлге жақын орналасқан Қабанбай ауылында өрт сөндіру депосының құрылысы басталды. Бұл бағыттағы жұмыстар кезең-кезеңімен жүзеге асырылады», – деді аймақ басшысы.
Әскери госпитальге қаржы бөлінді
Семейдегі екі қабатты әскери госпиталь ғимараты 75 төсек орынға арналған. Мұнда рентген, компьютерлік томография, флюрография кабинеттері бар. «Шығыс» өңірлік қолбасшылығына қарасты Семей, Павлодар қалалары және Жарма ауданының Жаңғызтөбе кентінің әскери гарнизондарына медициналық қызмет көрсететін мекемеде 2024 жылдың желтоқсан айында күрделі жөндеу басталған. Қазір демонтаж жұмыстары толық жүргізілген, алайда қаржылық қиындықтарға байланысты сыртқы жөндеу, электр желілерін тарту, жылыту және желдету жүйелерін орнату, ішкі әрлеу жұмыстары тоқтап тұр. Нысанды толық аяқтау үшін қосымша қаржы қажет.
Аймақ басшысы бұл мәселенің шешім табатынын жеткізіп, облыстық бюджеттен тиісті қаржы бөлінгенін айтты.
«Әскери госпиталь 1995 жылы пайдалануға берілген. Содан бері күрделі жөндеу жүргізілмеген екен. Құрылыс жұмыстары басталып, тоқтап қалған екен. Облыстық бюджетті соңғы нақтылауда қосымша 540 миллион теңге қаржы бөлдік. Құрылысты толық аяқтау үшін республикалық бюджеттен қаржы сұраған болатынбыз. Мұны Парламент Мәжілісінің комитет төрағалары Нұртай Сабильянов пен Айгүл Құспан да қолдап отыр», – деді облыс әкімі.
Жаңа саябақ құрылысы аяқталуға жақын
Қарағайлы ықшам ауданында салынып жатқан жаңа саябақтың құрылыс жұмыстарын қыркүйек айында аяқтау жоспарланған. Мұнда серуен жолдары, сахна, мәдени-көпшілік іс-шараларға арналған алаңдар мен демалыс аймақтары қарастырылады. Саябаққа жасыл желек отырғызылып, заманауи талаптарға сай жабдықталмақ.
Мердігер компания өкілі Мереке Берікұлының айтуынша, аумағы 5 гектар болатын саябақтың 2,6 гектарына түрлі жасыл-желек отырғызылып, автоматты суғару жүйесі орнатылады. Саябақтың орталық алаңы киіз үй пішінінде жасалып, сахна қойылады. Қала әкімдігі нысанның мәдени іс-шаралар өткізуге арналған кең қоғамдық кеңістік болатынын айтты. Қазір саябақ құрылысына 13 арнайы техника мен 20-ға жуық жұмысшы тартылған.
Жалпы, биыл «Аулаішілік аумақтарды ағымдағы жөндеу» бағдарламасы аясында шаһардағы 22 аулада абаттандыру жұмыстары жүргізіледі. Олардың тең жартысы сол жағалауда, қалғаны оң жағалауда орналасқан. Жоба аясында ашық спорт алаңдарын, балалар ойын алаңдарын және шағын сәулеттік формаларды орнату көзделген. Бұдан бөлек, халық қатысатын бюджет аясында қосымша 13 аула абаттандырылады. Қазір қаладағы 12 үйдің ауласында абаттандыру жұмыстары басталды.
«Қазір Семейдегі 35 ауланы абаттандыруды жоспарлап отырмыз. Жыл соңына дейін бұдан бөлек тағы 5 аула мен 5 қоғамдық кеңістікті, яғни арбаттарды, шағын саябақтарды жасаймыз. Келесі жылы қаладағы 150 ауланы абаттандыратын боламыз. Осылайша, кезең-кезеңімен облыс орталығындағы бүкіл аулаларды жаңартамыз. Қала әкімінің міндетін атқарушы Бекжан Бапышев тұрғындармен кездесіп, өтініш-тілектерін ескеріп, осы жұмыстардың барлығын қадағалап, басы-қасында жүруі керек», – деді аймақ басшысы.
Асыл ТҰМАР