Айтулы мерекеге орай ел астанасында футбол тарихындағы әлемдік деңгейдегі жұлдыздар мен Қазақстан құрамасының бұрынғы ойыншылары жолдастық кездесу өткізді.
Футболдың бастауы
Ұлтымызға аяқ доп сонау Кеңес үкіметінің дәуірінде кірген. Алғашқылардың бірі болып Семейде «Олимп», «Ласточка», «Орлята» және «Ярыш» командалары құрылған. Қазақ әдебиетінің тау тұлғалы жазушысы Мұхтар Әуезов өз заманында осы «Ярыш» клубында доп тепкен. Мұхтармен ілесіп қазақ жастары да футболға кіре бастады. Семейлік футбол жылнамашысы Евгений Один тапқан деректерге сүйенер болсақ, «Ярыш» халықаралық бәсекеге қатысқан алғашқы команда болып есептеледі. Әңгіме «Ярыштың» Семей қаласындағы Бірінші дүниежүзілік соғыс тұтқындарынан жасақталған командаға қарсы өткізген кездесулеріне қатысты. Әскери тұтқындар арасында біздің командаға қарсы 1912 жылғы Олимпиада ойындарының екі қатысушысы өнер көрсеткен. Қазақстандық футболдың қарлығаштары алғашқы ойындарын Қазан төңкерісіне дейін күз сайын өткізілетін атақты Семей жәрмеңкесі өтетін алаңқайда өткізіп келді.
Бертінге дейін қазақ футболы талай эволюциялық төңкерістен өтті. Ақыры егемендік алғаннан кейін 1992 жылы Қазақстан Футбол федерациясы өз қазығын қадады. Одан тағы бірнеше жылдан кейін 2002 жылдың 25 сәуірінде ресми түрде Еуропалық футбол қауымдастықтар одағының (УЕФА) құрамына кірдік. Дәл осы күннен бастап футболымызда жаңа леп пайда болды.
Тірі аңыздар – Астанада
Елордамызда Қазақстан футбол қауымдастығының ұйымдастыруымен аңыздар ойыны өтті. Жалпы, футбол әлемінде аңыздар ойыны жиі болып тұрады. Өз заманының жұлдызы әрі шебер атанған ойыншылары өзара жолдастық кездесу өткізіп, халықтың қошеметіне тағы бір бөленіп қайтты. Бұл – футбол тарихын дәріптеу, аңыз ойыншыларды құрметтеу мақсатында өткізілетін шара. Футболдың екі патшасы атанып кеткен Пеле мен Марадона да сонау 90-жылдары бірге матч өткізген деседі. Содан бері бұл дәстүр жалғасын тауып келе жатыр.
Жолдастық кездесуге әлем аңыздары құрамасының сапында Портуда қақпашы болып талай трофейді қанжылаған Витор Байя, әйгілі Зиданның басын кеудесімен тосқан Марко Матерацци, Интерде ең көп матч өткізіп, рекорд тіркеген Хавьер Занетти, әлем чемпионы Кристиан Заккардо, өзінің жылдамдығымен елдің назарын аудартқан Дуглас Майкон, қорғанысты бек ұстаушы Макелеле және де үш түрлі клубпен Чемпиондар лигасын ұтқан жалғыз футболшы Кларенс Зеедорф ойнады. Тірі аңыздарды көргенде жанкүйерлер ыстық қолдау көрсетіп, бір қуанып қалды.
Ал Қазақстан аңыздары құрамасы сапында Нұрбол Жұмасқалиев, Давид Лория, Таңат Нөсербаев, Ұлан Қонысбаев және басқа да танымал футболшылар алаңға шықты.
Ойын басталғалы-ақ қазақстандық футболшылардың белсенділігі байқалды. Олар көбіне бірінші нөмірмен ойнады. Сондай сәттердің бірінде шабуылшы Мұрат Тілешев португалиялық қақпашы Витор Байядан айласын асыра алмады. Көп ұзамай қазақстандықтар өз қақпаларына гол кіргізді. Голды Гаизка Мендиетаның өзі соқты.
Екінші таймда жерлестеріміз таразы басын теңестіруге тырысты. Нәтижесінде, Азат Нұрғалиев өз мүмкіндігін сәтті орындады. Бірінші голдан кейін ол лезде қарсыластың айып алаңын торуылдап жүріп, дәл келген пасты қақпаға түзу тепті. Солай командасын алға шығарды. Матч аяқталуға 10 минут қалғанда Давид Лория қорғаған Қазақстан футболының аңыздарының қақпасына пенальти белгіленді. Пенальти айып добын Англияда ең үздік сұрмерген атанып, атақты Манчестер Юнайтедтің атағын көкке көтерген Димитар Бербатов еш мүлтіксіз орындады. Осылайша, жолдастық кездесу 2:2 есебімен тең аяқталды.
SMH SPORTS бас директорының орынбасары Ника Кевхишвили ойын туралы қуанышын білдірді. «Біз Legends Match-ті Қазақстанға әкелгенімізге қуаныштымыз және жанкүйерлерге қазіргі заманның ең үздік футболшыларын көзбен көрудің бірегей мүмкіндігін береміз. Қазақстандағы ұлттық футбол күнінде мұндай матч жас таланттарды шабыттандырып, жанкүйерлердің басын біріктіріп, матчты одан да көп өткізу үшін барымызды саламыз», – деді ол.
«Біз Legends Match-ті қолдап, Қазақстандағы спорттық рух пен футболға деген ынта-жігерді ілгерілетуге көмектесуге қуаныштымыз», – деді 1XBET қазақстандық маркетинг жөніндегі директоры Юрий Матиун.
Әсет ҚАЛИ