Қуандық Бишімбаевтың туысы Бақытжан Байжанов рақымшылыққа іліксе, мерзімінен бұрын босап шығуы мүмкін. Бұл туралы оның адвокаты айтты, – деп хабарлайды Аikyn.kz сайты Tengrinews.kz-ке сілтеме жасап.
Адвокаттың айтуынша, Бақытжан Байжанов Степногордағы қауіпсіздігі орташа түзеу мекемесінде жазасын өтеп жатыр. Ал оның ағасы Қуандық Бишімбаев та сол қалада, тек № 5 қауіпсіздік барынша жоғары мекемесінде өтеуде.
Ол оның қорғауындағы Бақытжан Байжанов 2025 жылғы жаздан бастап шартты түрде мерзімінен бұрын босату туралы өтініш беруге құқылы екенін мәлімдеді.
“Онымен үнемі байланыста емеспін, сондықтан өтініш берген-бермегенін нақты білмеймін. Бірақ сот мұндай өтініштерді әзірге қарастырған жоқ”, – деді адвокат Ғазиз Ынтықбаев.
Оның айтуынша, Байжанов жазаны ауыстыру туралы өтініш білдіре алады.
“Ол сотқа тікелей емес, мекеме әкімшілігі арқылы өтініш береді. Алдымен мекеме барлық қажет ақпаратты жинайды: мінездеме, көтермелеу, дипломдары. Осыдан кейін құжаттар Степногор сотына тапсырылады”, – деді Ғазиз Ынтықбаев.
Заңгердің сөзінше, Бақытжан Байжанов рақымшылыққа ілігуі мүмкін. Алайда ол қылмыстық жауапкершіліктен толық босатылмайды.
“Екі санаты бар: қылмыстық жауапкершіліктен толық босату және мерзімін қысқартқан кезде жартылай босату. Байжанов екіншісіне ілігеді. Қалған жазаның үштен біріне дейін қысқартуы мүмкін. Өйткені қылмыс ауыр санатқа жатады”, – деп нақтылады заңгер.
Айта кетейік, Бақытжан Байжанов 4 жылға сотталған болатын.