in

Тұңғиыққа батқан «Тараз»

«Тараз» футбол клубының басына үйірілген бұлт сейілер емес.  Былтыр жоғары лигамен қош айтысқан команда төменгі топта да түк тындырмады. Турнир кестесінде 12-орынға бір-ақ құлдырап, жанкүйерді жерге қаратты. Ал ең қызығы, клубта қанша басшы ауысса да «баяғы жартас сол жартас» күйі қалып, алға жылжудың орнына кежегесі кейін тартып келеді.

Күні кеше клубқа Мұрат Ағы­баев есімді азамат бас­шы болып тағайындалды. Мұ­рат Жұмақожаұлының еңбек өті­ліне қарасаң 2017 жылы Қазақстан фут­бол федерациясында маман бол­ған. Кейіннен бас мамандыққа  кө­теріліп, 2023-2024 жылдары фе­де­рацияда спорттық департамент ди­ректоры қызметін атқарады. Сон­дай-ақ футбол лигасының спорт­тық директоры лауызымын да қатар алып жүрген. Осындай ең­бектеріне Қазақстан футбол фе­дерациясы президенті мен фут­бол лигасы президентінің «Фут­бол­ды дамытуға қосқан үлесі үшін» грамоталары табыс етілген. Тіп­ті, коронавирус дерті өршіп тұр­ған кезде біріншілікті тиянақты ұйым­дастырғаны үшін арнайы құр­меттелген. «Қазақстан футбо­лы­на 100 жыл» медалін де кеуде­сін­де жарқыратқан. Бір сөзбен айт­қанда, осындай білікті кадр «Та­разды» тұңғиықтан алып шығу керек болатын. Өз кезегінде жаңа ди­ректор клубтың 450 миллион тең­гедей қарызын жабуға уәде етіп, команданы жеңіске жете­леу­ге күш саламын деген-ді. Алайда бас­шының уәдесі сылдыр суға, одан әрі буға айналғалы тұрғандай. Олай дейтініміз – дәл қазір «Та­раз­ға» премьер-лига түгілі, бірін­ші лигада қалу мұң болып тұр. 

Негізі, «Тараз» клубы байыр­дан мықты ойыншылардың ұста­ха­­насы саналады. Жас футбол­шы­лар­ды шыңдауда алдыңғы қа­­­тар­дан көрініп, бүгінде клуб ба­засында 400-ге жуық жас жет­кіншек доп теуіп жүр. Олардың жасы 8-16 жас аралығында болса, талантты жастардың шоғыры 8 жас­тан жасақталуда. Міне, осы тә­лімгердердің арасынан  25 үздік ойыншы іріктеліп, екінші лигада өнер көрсеткен-ді. Алайда «Тараз­дың» негізгі құрамының өзі тө­мен­гі лигада ойнайтындықтан биыл екінші лигалық құрам тар­қап кетті. Бұл байырдан жалғасып келе жатқан ізбасарлық жүйенің бұзылғаны.           

Негізі, осыдан екі жыл бұрын «Та­раз» футбол клубының қарызы миллиардтан асып кеткен. Сол тұс­та жақсы ойыншылардың бар­лығы клубтан кетіп, команда бі­рін­ші лигада ойнауға мәжбүр бол­ған. Клубтың спорттық дирек­торы Ғабит Қазыбековтың ай­туын­ша, қазіргі мақсат осы қарыз­дан құтылып, командағы жоғарғы лигаға қайта шығару екен. 

– Алда тұрған мақсат – қарыз­ды жауып, келесі жылы премьер-ли­гада өнер көрсету. Ол үшін ко­ман­даны күшейтеміз. Сыртта  жүрген жамбылдық ойын­шы­ларды өзімізге алдырмақпыз. Мә­селен, қазір премьер-лигада доп теуіп жүрген Еркебұлан Тойбеков, Жалғас Жақсылықов, Мақсат Әмірхановпен сөйлесіп, коман­даға шақыруды бастап кеттік. Бір кездері «Тараздың» сұрмергені атанған Абылайхан Жұмабек қазір «Ордабасы» командасында ойнап жүр. Ол ойыншыны да шақырып жа­тырмыз. Бірақ олардың  пре­мьер-лигадан бірінші лигадағы ко­мандаға келуі көп келіссөзді қа­жет етуде. Себебі жалақы мә­се­лесінде едәуір айырмашылық бар. Алдымызда осындай қиындықтар тұрса да, біз оны еңсеруге күш са­ла­мыз.  

Тағы бір ерекше айта кетер­лі­гі, қазір  Қазақстан пре­мьер-лигасында 25 тараздық фут­болшы доп теуіп жүр. Командамыз жо­ғарғы лигаға  өтпесе де, же­ке­ле­ген ойыншылар  жоғарғы лигада ой­науда. Ал «Тараз» командасы са­­­пындағы Санжар Кемелбек пен Нұрдәулет Орынбасар Қазақстан жастар Ұлттық құрамасына  алын­ды. Бұл да үлкен жетістік. Осын­дай талантты футболшыларды түлеткен «Тараздың» алар асуы әлі алда деп сенемін, – дейді клубтың спорттық директоры.

Иә, сенім болғаны әрине дұ­рыс. Алайда әрекет те қажет. Бұл орай­да «Тараз» футбол клубына жұл­дызды ойыншының бірі Ұлан Қо­нысбаевтың қайта оралғаны жан­күйерлерді қуантқаны анық. Бірақ Ұлан бұл жолы клубқа ойын­шы емес, спорттық директор  бо­лып келіп отыр. Яғни, оған енді та­лантты ойыншыларды тауып, ко­мандаға тарту міндеттелуде. 

Негізі, Ұлан Қонысбаевтың тә­жірибесі жоқ дей алмайсың. 2008 жылы «Тараз» бірінші лигаға тү­сіп қалған кезде осы Ұланның үз­дік ойынының арқасында ко­ман­да қайта премьер-лигаға орал­ған болатын. Сондықтан Ұланның ал­дында осы ерлікті енді ойыншы емес, спорттық директор ретінде қай­талау мақсаты тұр.

Енді «Тараздың» бірінші ли­гадағы бүгінгі жағ­дайы­на келсек, іш қынжылады. Пре­мьер-лигаға өтпек түгілі, бірінші лиганың алдыңғы бестігінен көрі­ну қиынға соғуда.

Команда жаңа маусымның ал­ғаш­қы ойынында түркістандық «Же­­тісай» командасынан 1:2 есе­бі­мен жеңіліп қалды. Кезінде ел бі­рін­­шілігінің кубогын төбесінде кө­­терген «Тараз» үшін аудан дең­гейіндегі командадан ұтылып қалу – ұятты іс. Жанкүйерлердің осы реніші команда ойыншы­ла­рын қамшылады ма «Тараз» келесі екі ойында жеңіске жетіп, төртін­ші орынға тұрақтаған. Алайда бұдан кейін «Таразға» көз тиді ма, әлде сөз тиді ма белгісіз, әйтеуір қай­та кежегесі кейін тартты.  Атап айт­сақ,  «Каспий», «Ақтауға» 1:2, «Түр­кістанға» 0:1 есебімен есе жі­бер­дік. Содан соң «СД Фэмили» жә­не  «Хан тенгри» клубтарымен 1:1 есебімен тең ойнап, өз алаңы­мызда Павлодардың «Ертісіне» 0:1 есебімен жол бердік. Осылайша,  бес ойында бар болғаны 2 ұпайға ғана қол жеткіздік. 

Содан кейін де ойынымыз оңал­­ған жоқ. Сырт алаңда «Эки­бас­­туз» командасына 1:4, «Қайрат Ал­маты-2» командасына 1:3 есе­бімен ұтылдық. Ол аз десеңіз,  4 шіл­де күні өз алаңымызда Қара­ған­дының «Шахтеріне» 4:0 есебі­мен ойсырай тізе бүктік. Одан соң сырт алаңда «Акас» клубына 1:3 есе­бімен жеңіліп, өз алаңымызда «Академия Оңтүстік» коман­да­сымен 1:1 есебімен тең тарқастық. Бір сөзбен айтқанда, «Тараз» биыл­ғы жылдың бірінші айналым ойын­дарын 14 ко­ман­даның ішін­­­де 12-ші орын­мен аяқ­тап, жерге қа­рат­ты.

Бірінші ли­ганың кө­шін бас­тап тұрған «Каспий» 14 тур­­дың 11-інде ұтқан. Ақтаулық­тар­дан кейін тұрған «Ертіс», «Шах­тер», «Алтай» командалары 9 реттен жеңіске жеткен. Премьер-ли­гадан үмітіміз болса осы ко­ман­даларды жеңіп, бірінші лигада сәтті ойнауымыз керек. Әзірге он­­дай сәттіліктің төбесі де  көрі­нер емес. 

Қазір «Тараз» бірінші лигада екін­ші айналымын бастап жатыр. Енді 12 тур ойнайды. Сол 12 ойын­­­да жағдайымызды едәуір тү­зей аламыз ба? Біздің алдымызда тұрған «Эки­бастуз», «Хан тенгри» командаларының жерлестері­міз­ден 2 ұпайы ғана артық. Ал бесін­ші орында тұрған «Қайрат-Жас­тар» командасының  10 ұпайы ба­сым. Бесінші орындағы коман­даға жету үшін бізге қатарынан 4 жеңіс керек. Осындай жетістікке жете аламыз ба? Оны енді алдағы ойындар көрсетеді. 

Айтпақшы, клубқа жаңа бас­шы тағайындалғаннан кейін об­лыс әкімінің орынбасары Серік Сә­лемов «Тараздың»  бапкерлер мен ойыншылар құрамымен кез­десіп, билік тарапынан қажетті қол­даудың барлығы болатынын ай­­тып жігерлендірген. Өз кезегін­де жаттықтырушылар мен ойын­шы­лар келесі жылы премьер-ли­га­да доп тебеміз деп уәдені үйіп-төккен. 

Әзірге бұл уәде уәде күйі қалу­да. Әйтеуір, маусым соңында премьер-лига былай тұрсын, бірінші лигада қалу арманға айналып, бармақ тістеп жүрмесек болғаны…

Саятхан САТЫЛҒАН,

Жамбыл облысы