Жеке құрам Мемлекет басшысының жаһандық технологиялық трансформациялар жағдайында ел дамуының басым бағыттары және ұлттық қауіпсіздікті қамтамасыз етудегі цифрлық технологиялардың рөлін күшейтуді көздейтін стратегиялық үндеуін ерекше мақтанышпен қабылдады.
Мемлекет басшысының жыл сайынғы бағдарламалық құжаттары еліміздегі ахуалға әділ баға беріп қана қоймай, алдағы мақсат-міндеттерді де нақты белгілеп отырады. Биылғы Жолдаудың ерекшелігі жасанды интеллект технологияларын тиімді пайдалану, барлық салаға цифрлық трансформацияны енгізу, сондай-ақ энергетика саласын дамыту, оның ішінде еліміздің энергетикалық қауіпсіздігі мен технологиялық өрлеуінің негізгі тетігі ретінде атом электр стансаларын салу мәселесіне баса назар аударылуында болып отыр.
Президент атап өткендей, жасанды интеллект пен цифрландыру ел экономикасын ілгерілететін қозғаушы күшке, басқару сапасын арттыратын құралға әрі ұлттық қауіпсіздікті қамтамасыз етудің сенімді тетігіне айналуға тиіс. Мемлекет басшысы инновациялық технологияларды өнеркәсіп, білім беру, денсаулық сақтау және қорғаныс салаларына енгізудің маңыздылығын айта отырып, Қазақстанның жаһандық технологиялық процестердің белсенді қатысушысына айналуы қажеттігін қадап айтты.
Осы орайда, Қазақстанның Қарулы Күштері үшін тың мүмкіндіктер мен жаңа көкжиектер ашылуда. Армия қазіргі заманғы цифрлық шешімдерді енгізу арқылы басқару жүйелерін автоматтандыру мен цифрландыру бағытын дәйекті жүзеге асырып келеді. Қорғаныс министрлігі құрылымында жасанды интеллект технологияларын дамытуға арналған арнайы басқарма құрылып, «Сарбаз+» пилоттық жобасы іске қосылды, сондай-ақ цифрлық әскери комиссариат жүйесі енгізілді.
Бүгінде мониторинг, байланыс және навигация жүйелері белсенді дамып, ұшқышсыз ұшу аппараттарын қолдану ауқымы кеңейіп келеді. Жасанды интеллект алгоритмдерін жауынгерлік іс-қимылдарды жоспарлау мен басқару процестеріне ендіру бойынша жүйелі жұмыс жүргізілуде. Осы бағыттағы маңызды қадамдардың бірі – Қарағанды облысындағы «Сарышаған» полигонында өткен «Жауынгерлік достастық – 2025» оқу-жаттығулары барысында Әуе қорғанысы күштерін басқарудың автоматтандырылған жүйесінің алғаш рет сынақтан өтуі болды. Бұл – қорғаныс архитектурасын жаңғырту жолындағы айрықша бетбұрыс. Мемлекет басшысының 2025 жылғы 1 тамызда Қорғаныс министрін қабылдау барысында берген нақты тапсырмалары мен нұсқаулары Жолдауда көтерілген мәселелермен тікелей үндесіп жатқанын айта кету керек. Осы тапсырмалар шеңберінде Қорғаныс министрлігі әскерлердің ұтқырлығын және олардың қауіп-қатерлерге жедел ден қою қабілетін арттыру, Әуе шабуылына қарсы қорғаныс әскерлерін, аумақтық бөлімшелер мен ҰҰА құрамаларын дамыту, цифрлық трансформация талаптарын ескере отырып, әскери инфрақұрылымды жаңғырту, мемлекеттік қорғаныс тапсырысының тетігін жетілдіру, әскери қызметтің қауіпсіздігін арттыру және жарақаттанудың алдын алу, сондай-ақ қазіргі заманғы технологиялар негізінде Қарулы Күштердің жауынгерлік әлеуетін нығайту жөніндегі шараларды іске асыру бойынша кешенді жұмыс жүргізуде.
Аталған басымдықтарды орындау – еліміздің қорғаныс қабілеті мен ұлттық қауіпсіздігін қамтамасыз етудегі стратегиялық маңызды міндет. Инновациялық шешімдерді енгізу, ғылыми-техникалық әлеуетті дамыту және білікті мамандар даярлау Қазақстан Қарулы күштерінің XXI ғасырдың сын-қатерлеріне лайық болуына және мемлекет тірегі ретіндегі рөлін нығайтуына кепіл болмақ.
Президент Жолдауы барша қазақстандық қоғам үшін маңызды бағдар болмақ. Ал армия үшін бұл құжатты одан әрі жаңғыртуға, қорғаныс қуатын арттыруға және цифрлық технологиялар арқылы тиімділікті жаңа деңгейге көтеруге бағытталған нақты әрекет жоспары деп білеміз. Біз, әскери қызметшілер, Мемлекет басшысы ұсынған бағыттың толығымен жүзеге асатынына сенімдіміз. Еліміздің Қарулы Күштері алдағы уақытта да инновациялар мен жоғары жауынгерлік дайындық стандарттарына сүйене отырып, алға баса бермек.
Д. ҚОСАНОВ,
Қорғаныс министрі,
авиация генерал-лейтенанты