Көрменің негізгі мақсаты – өлкетану музейінің қорында сақталған, еліміздің белгілі ақындары мен өнер қайраткерлеріне тиесілі жеке домбыралар арқылы қазақ халқының ұлттық рухани мұрасын кеңінен таныстыру, домбыраның өнер мен мәдениеттегі ерекше орнын айшықтау.
Көрме барысында келушілер тарихи тұлғалар пайдаланған домбыралармен танысып, олардың шығармашылық жолы мен мәдениетке қосқан үлесі туралы мол мағлұмат алды. Экспозицияда ұлттық аспаптың әртүрлі үлгілері мен ерекшеліктері көрсетіліп, домбыраның қазақ күй өнері мен ән дәстүріндегі маңызы айтылды.
– Ұлттық домбыра күні – халқымыздың рухани байлығын, төл өнерін ұлықтайтын мереке. Бүгінгі ұйымдастырылып отырған «Ұлы дала үнісің сен, домбыра!» атты көрменің мақсаты – қазақтың киелі аспабы арқылы ұлттық мәдениетті насихаттау. Бұл көрме – бір ғана музыкалық аспапты көрсету емес, бұл – тұтас бір дәуірлердің, тарихи тұлғалардың рухын сезіндіру, жастарға өнеге беру. Ата-бабалардан мирас болған асыл өнер арқылы біз жас ұрпақтың бойына ұлттық құндылықтарды сіңіре аламыз. Домбыра – халқымыздың үні, шежіресі, тектілігінің нышаны. Осындай рухани-мәдени шаралар арқылы біз төл өнерімізге деген құрметімізді көрсетеміз. Көрмеге арнайы келіп, атақты күйшілер мен өнер саңлақтарының домбыраларын көруге келген барша жұртшылыққа алғысымды білдіремін, – деп атап өтті Семей қаласының облыстық тарихи-өлкетану музейінің директоры Қайрат Сабырбаев.
Көрмеге Абай дәстүрінің жалғастырушылары Сапарғали Әлімбетов, Тәңірберген Әміренов, дүлдүл әншілер Жәнібек Кәрменов, Болат Сыбанов, Келденбай Өлмесеков, Мейрамбек Ахметов, Кентау Назарбек, Берік Омаров, ақындар Ақылбек Манабаев, Дәметкен Омарбаева, Абайдың жиені Балтабек Ерсәлімов, композитор әрі күйші Рахымбек Ноғайбаев, белгілі ғалым Амантай Исин және басқа да өнер қайраткерлерінің домбыралары қойылды.
Сонымен қатар 30 маусым күні Абай облысында ерекше флешмоб ұйымдастырылды. 200 полицей бір уақытта бірдей «Адай» күйін орындады. Іс-шара Семей қаласындағы Абай музейінің алдында өтті – бұл халқымыздың рухани құндылықтары тоғысатын қасиетті мекен.
Осылайша, Құқық қорғау саласының өкілдері әйгілі Құрманғазының күйін оркестр болып орындап, ұлттық мұрамызға деген құрметтерін көрсетті. Домбыра үні халықтың жүрегіне жол тауып, көрермендерге ерекше әсер сыйлады. Бұл – полиция қызметкерлерінің заң мен тәртіп қана емес, ұлттың рухани болмысына да жақын екенін білдіретін жарқын белгі.
Ал Абай облысы бойынша ҚАЖД №19 мекемесінің қызметкерлері қазақ музыкалық мәдениетінің басты символы Домбыра күніне арналған ерекше және шабыттандыратын Jam session музыкалық іс-шарасын өткізді. Шараға олар өңірдегі әйгілі «Үш қыран» тобының құрамынан дәстүрлі әнші Қуанышбек Ахметбекұлын шақырды. Ол қызметкерлерге Jam сессиясын өткізу тәртібін үйретті. Іс-шараның бастамашылары мекеменің өнерге бей-жай қарамайтын қызметкерлері болды, олардың арасында көптеген талантты орындаушылар бар. Импровизацияланған концерттік аймақта Құрманғазының, Дина Нұрпейісованың әйгілі күйлері, сондай-ақ авторлық аранжировкадағы заманауи композициялар шырқалды. Музыкалық кездесу атмосферасы ата-баба рухына, тарихты құрметтеуге және елдің мәдени мұрасына деген мақтанышқа толы болды.
– Мен бұл шараға шақырту алған кезде қатты таң қалдым. Бұл музыканттар жиналып, дайындықсыз және белгілі бір келісімсіз ойнайтын бірлескен музыкалық сессия. Мұндай оңай емес жұмыс істейтін қызметкерлер домбырада жақсы ойнай алатыны қуантарлық жағдай, – дейді дәстүрлі әнші Қуанышбек Ахметбекұлы.
Еске сала кетсек, Қазақстанда жыл сайын шілде айының алғашқы жексенбісінде ұлттық Домбыра күні атап өтіледі. 2018 жылы Президенттің бастамасымен бекітілген бұл мереке ұлттық бірегейлікті нығайтуға, жастардың дәстүрлі мәдениетке қызығушылығын оятуға және ұрпақтар сабақтастығын насихаттауға бағытталған.
Кербез ЕСІМ