Қай кезде де ұлт саулығы мемлекеттің негізгі капиталы болып табылады. Сондықтан да саланы өркендетуде бірінші кезекте денсаулық сақтау саласын дамытуға бағытталған кешенді шараларды нәтижелі жүзеге асыру міндеті жүктеліп отыр.
Мемлекет басшысының тапсырмасымен елді мекендердегі ақ халаттылардың әл-ауқатын арттырып, медициналық қызметтің аясын кеңейтуге бағытталған ұлттық жобаның Қызылорда облысында атқарылу нәтижесі көз қуантады. Мәліметке сәйкес, соңғы үш жылда облыстың денсаулық сақтау саласына барлығы 440 млрд 700 млн теңге қаржы бөлініп, халықтың сұранысына сәйкес түйіткілді мәселелер шешімін табуда. Соның ішінде «Ауылда денсаулық сақтауды жаңғырту» ұлттық жобасы аясында өңірдің барлық аудандарында құны 10 млрд 763 млн теңгеге 28 медициналық нысан салыныпты.
Қызылорда облыстық Денсаулық сақтау бақармасының хабарлауынша, ана мен бала өмірін қорғау мақсатында көпбейінді облыстық аурухана базасында жаңа МРТ аппараты іске қосылып, 70 орындық перинаталдық бөлім ашылған. Сол сияқты облыс орталығында 36 млрд 400 млн теңгеге емханасы мен онкологиялық бөлімшесі бар 300 орындық көпбейінді аурухана құрылысы басталса, ұлттық жоба аясында құны 4 млрд 500 млн теңгеге 4 көпбейінді аудандық орталық аурухана жанынан қосымша ғимарат қүрылыстары қарқын алған.
«Аймағымызда халықтың медициналық қызметке қолжетімділігін арттыру бағытында атқарылып жатқан жұмыстар аз емес. Соңғы үш жылда 6 млрд теңгеге 24 медициналық нысан күрделі жөндеуден өтіп, халықтың игілігіне жұмыс жасауда. Сонымен қатар құны 1 млрд 200 млн теңгеге 44 денсаулық сақтау ғимараттарының жылу жүйесі газға ауыстырылған. Жалпы, соңғы жылдары медициналық қызметтің сапасын арттыру мақсатында 15 млрд теңгеге медициналық құрал-жабдықтар сатып алынды. Соның негізінде емдеу орындарының медициналық құрал-жабдықтармен жабдықталу деңгейі 2022 жылы 83,2 пайыз болса, бүгінде бұл көрсеткіш 87,4 пайызға арып отыр. Өңірде жедел жәрдем қызметіне қолжетімділік бар. Соңғы 2 жылда жергілікті бюджеттен 5 млрд 400 млн теңгеге 225 дана жаңа санитарлық автокөліктер алынып, барлық елді мекендеріндегі денсаулық сақтау ұйымдарына табысталды. Сол сияқты халық сұранысына сәйкес 45 жедел жәрдем көлігі алынып, облыстық медициналық жедел жәрдем стансасы 100 пайыз қамтамасыз етілді. Осылайша, елді мекендерді санитарлық автокөлікпен қамту мәселесі толық шешімін тапты. Аймақта медицина саласын дамытуға бюджеттен тыс ресурстар да тартылуда. Біз «Қазақстан халқына» қоғамдық қорымен тұрақты әріптестік байланыста жұмыс жасап жатырмыз», – дейді Қызылорда облыстық Денсаулық сақтау басқармасының басшысы Олжас Искаков.
Аталмыш қор соңғы екі жылда өңірдің денсаулық сақтау саласына 4 млрд теңгеден астам қаржы бағыттапты. Бұл қаржыға облыстық балалар ауруханасы базасында «Қамқорлық» орталығы ашылған. Жақын күндері облысқа қарасты Арал ауданында да дәл осындай орталық ашу жоспарда тұр.
Сонымен қатар қордың ықпалымен облыстық Онкология орталығы құны 1 млрд 100 млн теңге тұратын скрининг жүргізуге арналған жылжымалы медициналық кешенмен қамтамасыз етілген. Қазіргі таңда кешен өңіріміздің шалғай елді мекендеріндегі тұрғындарға үздіксіз сапалы қызмет көрсетіп келеді. Аймақ жұртшылығын сирек кездесетін дертке қарсы дәрі-дәрмектермен қамту бағытында да түйткіл жоқ.
«Сыр өңірінде медицина саласына тың серпін беретін байыпты бастамалар мұнымен шектелмейді. Соның айғағындай, өңірде медицина саласындағы қызметкерлерді әлеуметтік қолдау, кадрларды тұрақтандыру мақсатында 100 пәтерлік жаңа тұрғын үй құрылысы жүргізіліп жатыр. Құрылыс жұмыстары жыл соңына дейін аяқталып, пәтер кілттері табысталады деп күтілуде. Осы орайда халыққа сапалы медициналық қызмет көрсету үшін дәрігер мамандардың біліктілігін арттыру мәселесі назардан тыс қалған емес. Бұл тұрғыда былтыр 10 реаниматолог, 5 кардиолог маман Түркияның жетекші медициналық клиникасында білімдерін жетілдірсе, биыл 41 медицина қызметкері Германия, Ресей, Литва, Беларусь елдеріндегі алдыңғы клиникалық базаларда өз біліктілігін арттырған. Осылайша, халықаралық байланысты нығайта отырып, болашақ тәжірибелі маман даярлау ісінде ілгерілеушілік бар», – дейді басқарма басшысы Олжас Ермекұлы.
Қазіргі уақытта өңірге аса қажетті медицина мамандықтар бойынша 176 резидент облыс әкімінің грантымен білім алуда. Бұған қоса, «Жалпы тәжірибелі дәрігер» мамандығы бойынша мамандар даярлауға облыс әкімінің 177 білім беру гранты бөлініпті.
Осы сияқты саланы дамытуға бағытталған ауқымды жұмыстар нәтижесінде өткен жылмен салыстырғанда өңірде сәбилер өлімі 17 пайызға, қатерлі ісіктерден болатын өлім-жітім 9 пайызға, қан айналым жүйесінен орын алатын адам өлімі 1,5 пайызға төмендеген.
Қалай дегенде де, Сыр өңірінде жүргізіліп жатқан кешенді шаралар жоғары нәтижеге ие. Алдағы уақытта да ұлттық жоба шеңберінде атқарылар жұмыстардың ауқымы кең.
Ербақыт ЖАЛҒАСБАЙ, Қызылорда облысы