Өйткені өнер шекараға бағынбайды, ол халықтар арасындағы ортақ тілге, өзара түсіністікке қызмет етеді. Әрбір мәдени туынды белгілі бір ұлттың топырағында дүниеге келсе де, оның мәні мен мағынасы бүкіл адамзатқа ортақ бола алады. Бұған дәлел – әлемдік жұлдыздардың өнері. Қазақ Димашты, Америка Джей Лоны меншіктей алмайды. Өйткені олардың таланты адамзатқа ортақ.
2025 жылдың есте қалған мәдени оқиғаларының бірі – Джей Лоның Қазақстанға келуі. Иә, бұл жаңалықты естіген сәтте ешкім сенбеді. Бірақ сәуір айында Astana Concert компаниясының продюсері Мәлік Хасенов концерт ойдағыдай өтсе, ел бюджетіне 400 млн теңге шамасында салық түседі деп болжады.
– Дженнифер Лопестің келуі – Астананың A класты жұлдыздар гастрольдік картасында жаңа кезең ашатын маңызды оқиға болмақ. Шетелден 15 мыңнан астам турист келеді деген болжам бар. Қала экономикасына қосатын жалпы үлес 6,5 миллиард теңге көлемінде болады, бұл HoReCa жүйесіне (қонақүй-ресторан бизнесі сегменті) және концерттен түскен 400 миллион теңгеден астам тікелей салықтық түсімдерден тұрады, – деді Мәлік Хасенов.
Оның айтуынша, Қазақстанда мәдени туризм саласында үздік болуға барлық қажетті ресурс бар. Астана әкімдігімен бірлесіп алдағы үш жыл ішінде елордада А класындағы жұлдыздардың 10 концертін өткізуді көздейтін іс-шаралық туризмді дамытудың стратегиялық жоспарын әзірлеу жоспарлануда. Осылайша, халықаралық деңгейдегі концертті халық асыға күтті. Билет сатып алу үшін де сайтта сағаттап кезек күтті. Астанада өтетін концерт билеттері 3 сағат 51 минутта сатылып кетті. Сұраныстың көптігіне орай ұйымдастырушылар Джей Лоның командасымен келіссөз жүргізіп, 10 тамызда әлемдік жұлдыз Алматыда екінші рет өнер көрсетті.
Джей Ло Қазақстанның қошеметіне бөленді
Әлемдік мегажұлдыздың Астанадағы шоуына 25 мыңнан астам адам билет сатып алған. Оның кемінде 30 пайызы шетелдік туристер. Мамандар бұл концерттің ел экономикасына нақты пайда әкелгенін айтады. Қонақүй, мейрамхана және қоғамдық тамақтану нысандары 6 жарым миллиард теңге көлемінде пайда табады деп жоспарланған. Ал тікелей салық түсімі 400 миллион теңгеден асады деп көзделген. Ал концерт өтетін күні Астана-Арена маңындағы қауіпсіздікті 1300-ге жуық полиция қызметкері қамтамасыз етті. Концертке көлік қозғалысы өте жақсы ұйымдастырылды: арнайы автобустар, кең тұрақтар мен такси үшін ыңғайлы жағдайлар жасалды. Көрермендер үшін аренаның өзіне дейін жүретін арнайы шаттлдар ұйымдастырылды. Таксимен немесе жеке көлікпен жүргендер оңай тұрақтады – кептелістер болмады. Аренаның жанында кең автотұрақтар жұмыс істеді.
Жанкүйерлер елдің түкпір-түкпірінен, тіпті шетелдерден келді. Қонақтардың арасында Ресей, Қырғызстан, Моңғолия, сондай-ақ АҚШ-тан арнайы келген көрермендер болды. Ал Джей Ло сахнаға шыққан кезде көрермендер ерекше қошемет көрсетті. Ол сүйікті хит әндерін орындады: Ain’t Your Mama, Let’s Get Loud, Love Don’t Cost a Thing, If You Had My Love, Get Right және ерекше ықыласпен қарсы алынған Jenny from the Block. Ән айтумен шектелмей, залмен сөйлесіп, гүл қабылдап, жылы сөздер айтты. Әнші сахнада тұрып: «Сендер ғажапсыңдар, Қазақстан!» – деп ерекше ықыласын да білдірді.
Концерттен кейін Джей Ло өзінің Instagram парақшасында Астанаға арналған екі жазба жариялады. Ал әншімен бірге жұмыс істейтін бэк-вокалистер мен музыканттар Қазақстан туралы әсерлерін әлеуметтік желіде белсенді түрде бөлісті. Олар елдің атмосферасын, адамдарының жылылығын, сәулеті мен табиғатын ерекше ықыласпен атап өтті. Топтың барабаншысы Чарльз Стритер өз видеосында: «Мұндағы адамдар өте мейірімді, ашық-жарқын. Маған біздің оңтүстіктің – Мемфис, Теннесси, Миссисипи өңірлерінің тұрғындарын еске салды. Архитектурасы мүлде басқа әлем секілді. Тамақтары да өте дәмді. Көргілерің келсе, міндетті түрде осында келіңдер», – деп әсерін жеткізді.
Ал бэк-вокалист қыздар: «Қазақстан осындай деп кім ойлаған? Ауа райы керемет, шамамен 22 градус. Өте әдемі! Қазақстан, бізге ұнайды», – деп видеожазба таратты. Ыстық Дубайдан кейін Астананың қоңыр салқын ауа райы америкалық өнер иелеріне ерекше жайлы болғаны анық.
Әлеуметтік желі қолданушылары да Джей Лоның командасына қолдау білдіріп, жылы пікірлерін жаудырды. Бұл жағдай Қазақстанның мәдени кеңістігі мен қонақжай бейнесінің әлемдік аудиторияда оң әсер қалдырып жатқанын тағы бір мәрте көрсетті.
Астанадағы әсерлі кештен кейін әншіні Ереван, Ыстанбұл және Ташкент қалаларындағы концерттер күтіп тұрды. Әр екі күн сайын бір елдің астанасында немесе ірі мегаполисінде өнер көрсетіп жүрген 56 жастағы әртістің қажыр-қайраты мен сахнадағы жоғары деңгейдегі шеберлігі көпшілікті тәнті етті. Гастрольдік кестенің тығыздығына қарамастан, оның әрбір концерті кәсіби деңгейі мен көрерменге деген құрметін айқын көрсетті.
Ал 10 тамызда Джей Ло Алматыға қайта оралды. Бұл жолы шоу қаладағы Орталық стадионда өтті. Қауіпсіздікті екі мыңнан астам полиция және алты жүз әскери қадағалады, ал 300-ге жуық ерікті қонақтарға орындарын табуға көмектесті. Концерт билеттері түгелдей сатылып кеткен. Оларды 35-тен аса елдің тұрғындары сатып алған. Ең көп қызығушылық танытқандар: ТМД елдері, Еуропа, АҚШ, БАӘ, сондай-ақ Канада, Түркия, Жапония, Қытай және Оңтүстік Корея азаматтары. Концерт барысында ерекше сәттердің бірі – жас жұп әншіге конверт беріп, болашақ баласының жынысын жариялауды өтінді. Лопес микрофоннан: It’s a girl деп жариялап, стадионды шаттыққа бөледі.
Концерт кезінде тағы бір қызықты оқиға болды: Джей Ло сахнада өнер көрсетіп жатқанда кенет оның үстіне шегіртке қонды. Көрермендер бір сәтке таңғалып қараса да, Джей Ло сабыр сақтап, мойнына қонған шегірткені қолымен абайлап қағып жіберіп, сахнадағы өнерін жалғастырды. Көрермендер бұл сәтті жылы қабылдап, әншінің кәсібилігі мен сенімділігін жоғары бағалады. Осы қызықты оқиғаны Джей Ло кейін америкалық The Tonight Show Starring Jimmy Fallon шоу бағдарламасында айтып берді. Ол әзілмен: «Астана сахнасында тіпті шегіртке де менімен бірге биледі!» деп бөлісті. Көрермендер үшін бұл оқиға әншінің ашық мінезін, қиын сәтте де сабыр сақтай білетінін және сахнадағы кәсібилігін тағы бір мәрте көрсетті.
Димаш әлем сахнасын бағындырды
Джей Ло Қазақстанда концерт өткізсе, Димаш Құдайберген Алматы, Ереван, Анталия, Куала-Лумпур, Гонконг, Будапешт, Ыстанбұл, Астана, Прага – Дюссельдорф, Нью-Йорк, Мехико, Барселона, Лондон, Берлин, Рига қалаларында тур өткізді. Димаштың Испаниядағы алғашқы жеке концерті аншлагпен өтті. Әнші Барселонадағы әйгілі Olimpic Arena Badalona Олимпиадалық аренасында көпшілікке Stranger атты бағдарламасын ұсынды. Ән кешіне әлемнің елу елінен жанкүйер келген. Көрермен Димаштың әнін қосыла шырқап, талантқа қошеметті жаудырды. Өнерде шекара жоқ. Оған Димаштың Барселонадағы концерті тағы бір дәлел. Әлемдік деңгейдегі әншіні көруге Еуропа, АҚШ, Канада, Латын Америкасы, Азия, алты құрлықтан жанкүйер жиналған. Елуден астам елдің өкілі алдымен Қазақстанның Әнұранын Димашпен қосыла шырқады.
«Сүйікті әншімнің Испанияға келетінін естігенде қатты қуандым. Бұл күнді мен асыға күттім. Ерекше әсерде тұрмын, ғажап концерт»,– деп пікірімен бөлісті Чилиден келген жанкүйер Каталина.
Қамзол, шапан киіп, ұлттық әшекей бұйымдарды таққан жанкүйерлер қазақтың көк туын желбіретіп, кумирлеріне барынша қолдау көрсетті. Әсіресе, испандық фан клуб мүшелерінің қуанышында шек жоқ. Димаштың жанкүйерлер қауымдастығын Мадрид, Барселона мен Валенсия қалаларында құрған фанаттар осы концертті талай жыл армандап еді. Солардың құрметіне Димаш испан тілінде ән шырқады. Қазақстанның Халық әртісі концертте көпшілікке қазақтың күй өнерінің құдіретін сезіндірді. Сырға толы ұлттық әндермен бірге, әлемдік классика жауһарларын да құйқылжыта орындады. Жүректен шыққан әр ән жүрекке жетіп, тыңдарманның жан дүниесін тебірентті.
Димаштың көрермендері қазір әлемнің түкпір-түкпірінде. Оның дәлелі Димаштың Мексикадағы концерті. Алғашында бір концерт жоспарланған болатын, алайда 10 мың билет бірнеше сағаттың ішінде сатылып кеткен соң, ұйымдастырушылар бірден екінші концерт өткізу туралы шешім қабылдады. Бұл – Димаштың мансаптық жолында үшінші рет қайталанып отырған ерекше жағдай. Бұған дейін дәл осындай аншлаг 2019 жылы Мәскеуде және 2024 жылы әншінің отаны Астанада болған еді.
P.S.
Осылайша, биылғы жыл ел мәдениетіндегі ерекше концерттермен есте қалды. Джей Ло мен Димаштың шоуын әлі ондаған жыл бойы, бірнеше ұрпақ аңыз ғып айтатыны анық. Өйткені өнер – адамзаттың өшпес мұрасы.
Көктем ҚАРҚЫН