Өңірде аграрлық саланы әртараптандыру мен қайта өңдеуді күшейту бағытында маңызды істер қолға алынған. Биылғы орақ маусымы ауыл үшін ерекше серпінмен басталды. Егіс даласында техникалар тынымсыз жұмыс істеп, жаңа агротехнологиялар енгізілуде.
Бүгінде аймақта мал бордақылау алаңдары мен сүт фермаларының саны көбейіп, ауыл шаруашылығы өндірісі жаңа деңгейге шықты. Нұра ауданының Көбетей ауылында еуропалық стандарттарға сай жабдықталған сүт-тауар фермасы ашылды. 1 100 басқа арналған нысанның инвестициялық жобасын «Рамадан МФ» ЖШС «Черниговское и К» ауылшаруашылық кәсіпорнымен бірлесіп жүзеге асырған. Ферма жылына 9 мың тонна сүт өндірмек.
Сонымен қатар Осакаров ауданында заманауи сүт-тауар фермасының құрылысы басталды. Құны 30 млрд теңгеден асатын бұл ауқымды инвестициялық жоба еліміздегі сүтті мал шаруашылығы саласындағы ең ірілерінің бірі болмақ.
Фермада келешекте 6 мың сауын сиыр ұсталады. Ол үшін жеке жемшөп қоры дайындалады. Бүгінде 1 мың гектар жерге жүгері мен жоңышқа егілген. Ауқымды ауылшаруашылық кешені өңірдегі сүт өңдеу кәсіпорындарын шикізатпен қамтамассыз етеді. Сөйтіп, импортқа тәуелділікті азайтады.
– Бізге өнімділікті арттыру үшін бірінші кезекте мол жемшөп қоры қажет. Биылғы маусымда суармалы алқаптарды 4,5 мың гектарға, ал жыл соңына дейін 10 мың гектарға жеткіземіз. Жоба үш жылда кезең-кезеңімен жүзеге асады. Алдымен 1200, сосын 2400, кейін ферма жұмысы жолға қойылған соң 6000 сауын сиыр ұстаймыз. Фермаға Ресейден голштин-фриз тұқымды сиырлар жеткізіледі. Олардың біреуі күніне 40 литрге дейін сүт береді. Осылайша, облыстағы фабрикаларды сүтпен қамтамасыз етіп отырады. Ол үшін фермаға неміс технологиясымен жұмыс істейтін заманауи сауын аппараттары, өзге де қажетті қондырғылар орнатылады, – дейді «Евразия Инвест LTD» ЖШС құрылтайшысы Иван Георгиади.
Мемлекет ұсынған жеңілдетілген несие, субсидия мен инвестициялық жеңілдіктер облыстың ауыл шаруашылығы субъектілері өнім өндіру көлемін тұрақты арттырып, өңірлік азық-түлік қауіпсіздігін қамтамасыз ету ісіне өз үлесін қосып отыр. Қарағанды облысы ауыл шаруашылығы басқармасының деректеріне сүйенсек, биылғы жылдың сегіз айында өңір шаруалары 56,5 мың тонна ет, 143,5 мың тонна сүт, және 413 миллион дана жұмыртқа өндіріп үлгерген.
Бұл өткен жылмен салыстырғанда, тұрақты өсім көрсетіп отыр. Ет өндірісіндегі өсім 105 пайыздан асқан, сүт өндіру 101 пайыздық межені бағындырған.
Ал егін алқаптарында жұмыс қауырт. Биыл облыс бойынша 914 мың гектарға жуық жерге дән себілсе, оның басым бөлігі – бидай, арпа және сұлы алқаптары. Мамандардың алдын ала болжамы бойынша, орташа түсім 10 центнерден асса, қамбаға бір миллион тоннаға жуық астық құйылады деп күтілуде.
Картоп пен көкөніс егілген алқаптарда да өсім бар. 14 мың гектардан астам жерге картоп егіліп, өнімділік гектарына 250 центнерден асып отыр. Бұл шамамен 370 мың тоннаға жуық өнім. Ал көкөніс дақылдарынан алынған өнім көлемі 75 мың тоннадан асқан.
Ауыл шаруашылығы басқармасының мәліметінше, биылғы науқанға 1 976 астық жинайтын комбайн мен жүздеген заманауи техника жұмылдырылған. 8 айда агроөнеркәсіп кешеніне 38,9 миллиард теңге инвестиция тартылған. Оның басым бөлігі – 32 миллиард теңге ауыл шаруашылығы өндірісіне, қалғаны тамақ өнімдерін өндіруге бағытталған. Қазір егіс даласында спутник жүйесіне қосылған комбайндар, GPS арқылы қозғалысын бақылап отыратын тракторлар, өнім сапасын саралайтын электрондық өлшеуіштер жұмыс істейді.
Облыс бойынша 31 жаңа жоба іске асырылмақ, жалпы құны – 47,4 миллиард теңге. Мал шаруашылығында бордақылау алаңдары, сүт өңдеу цехтары мен агрокооперативтер құрылып жатыр.
– Мемлекет тарапынан жасалып жатқан қолдау шаруаларға үлкен серпін беріп отыр. Қазір фермерлер тек өнім өсірумен шектелмей, оны өңдеуге, экспортқа шығаруға бет бұрды. Ең бастысы, ауылдағы еңбек бағаланып, өз жемісін береді, – дейді облыстық ауыл шаруашылығы және жер қатынастары басқармасы басшысының орынбасары Сырым Бошпанов.
Әдебиет БЕЛГІБАЙҰЛЫ,
Қарағанды облысы
