Қазір Алматыда 128 студенттік жатақхана және 60 жеке хостел орналасқан. Алайда биылғы оқу жылында қалаға ағылатын студенттер легінің санын ескерсек, қажеттілік бұдан әлдеқайда көп. Кейінгі жылдары билік өкілдері жатақхана санын көбейтуді уәде етіп келеді. Қала әкімдігі тарапынан жатақхана салу және орын тапшылығы мәселесін шешу үшін қандай шаралар қолға алынған? Жаңа жатақханалар салынған күннің өзінде студенттерге берілетін орындар әділ бөлінетініне кім кепілдік береді? Біз осы және өзге де маңызды сауалдарымызды Алматы қаласы Жастар саясаты басқармасына жолдаған едік.
Басқарма мәліметіне сүйенсек, қалада студенттік жатақханалардағы орын тапшылығын азайту жөніндегі жұмысты тиімді үйлестіру үшін Алматы қаласы әкімдігі мен Ғылым және жоғары білім министрлігі бірлесіп, 2023 жылы студенттік жатақханалар салу жөніндегі жобалық кеңсені іске қосқан. Мамандар бұл бастама өз нәтижесін беріп келе жатқанын алға тартты.
Кеңсе жұмысын бастаған уақыттан бері қаладағы студенттерге арналған 34 жатақхана пайдалануға берілді. Жүргізілген жұмыстардың нәтижесінде студенттерге арналған жатақхана орындарына сұраныс төмендеп, бастапқы 32,7 мың орыннан 23,7 мың орынға дейін қысқарды. «Алматы қаласын 2025 жылға дейін дамыту бағдарламасы және 2030 жылға дейінгі орта мерзімді перспективалар» Жол картасын жүзеге асыру аясында биылғы жылдың соңына дейін 6 049 орынға арналған 15 нысанды пайдалануға беру жоспарланып отыр, – деді Алматы қаласы Жастар саясаты басқармасы.
Кей жағдайда жатақханаға орналасу кезінде студенттер арасында әділетсіздік пен таныстыққа жол беріледі деген пікірлер бар. Бірақ Жастар саясаты басқармасы жатақханадан орын бөлу ереже бойынша қарастырылатынын, ешқандай тамыр-таныстыққа жол берілмейтінін негізге алды. Дәлірек айтсақ, жатаханадағы орындар ең алдымен жаңадан жоғары оқу орнына түскен 1-курс студенттеріне беріледі. Кейін жоғары курс студенттерінің өтініштері қарастырылып, бөлу процесі ЖОО-да комиссиялық түрде, студенттің әлеуметтік жағдайы мен мәртебесіне қарай жүзеге асады.
Әрине, бұл пікір ата-аналар мен студенттердің арасында әлі күнге дейін кездеседі. Бірақ қазір мен бұл ақпаратты жоққа шығарғым келеді. Себебі қазір барлығы заңды әрі ресми түрде жүргізіледі. Жоғары оқу орындарының басты міндеті – жаңадан қабылданған студенттерді толығымен жатақханамен қамту. Әсіресе, ең алдымен алыс аймақтардан келген және жеңілдігі бар студенттерді жатақханаға орналастырады. Егер бос орын қалған жағдайда өзге де студенттерді жатақханамен қамту қарастырылған, – деді Алматы қаласының студенттік омбудсмені Айболат Сембиев.
Сондай-ақ қазір Алматы қаласының әкімдігі мен Ғылым және жоғары білім министрлігінің бірлескен бастамасы аясында ALT университеті базасында 40 орындық Дағдарыс орталығы жұмыс істейді.
Орталық өмірлік қиын жағдайға тап болған студенттерге психологиялық және әлеуметтік көмек көрсетіп, уақытша баспана ұсынады. Мұнда кәсіби психологтан құпия кеңес алуға болады. Сондай-ақ қажет болған жағдайда студенттерге құқықтық және медициналық көмекке бағыттау түріндегі қолдау қарастырылған. Орталықта жайлы өмір сүруге қажетті барлық жағдай жасалған. Қауіпсіздік және өзін-өзі қолдау мәселелері бойынша тұрақты түрде тренингтер мен ақпараттық іс-шаралар өткізіледі, – деді басқарма өкілі.
Бүгінде шаһардағы барлық 35 университетте cитуациялық орталықтар жұмыс істейді. Бұл орталықтар студенттердің өтініштері мен мәселелерін нақты уақыт режимінде қабылдап, деректерді жаңартып, жедел шешім қабылдауға мүмкіндік береді. Мұнда азаматтарды қабылдау, кеңес беру қызметі көрсетіледі. Жұмыс оқу орындары мен тиісті құрылымдар арасында тығыз байланыс орната отырып жүргізіледі. Басқарма өкілі Ситуациялық орталық студенттер мен университет әкімшілігі арасындағы сенімді және тиімді байланыс алаңына айналып отырғанын атап өтті.
Биылғы 27 маусымда Алматы қаласы әкімдігі студенттердің жатақханадағы тұрмыс жағдайының жарамдылығын тексеру мақсатында бірінші кезеңдегі мониторинг жұмыстарын ұйымдастырды. Мониторингке Алматы қаласының Қоғамдық кеңесі мүшелері, қоғам белсенділері, үкіметтік емес ұйым өкілдері, жастар істері жөніндегі комитет мүшелері мен қала волонтерлері қатысты. Тексеру нәтижесі бойынша жатақханалардың жағдайын жақсартуға байланысты бірқатар ұсыныс пен түзету шаралары берілді, – делінген Алматы қаласы Жастар саясаты басқармасы берген жауабында.
Басқарма дерегінше, биыл 20 тамыздан бастап Ғылым және жоғары білім министрлігінің, сондай-ақ бұқаралық ақпарат құралдарының қатысуымен екінші кезеңді өткізу жоспарланып отыр.
Алтынай БАУЫРЖАНҚЫЗЫ,
Алматы қаласы
