Оның ішінде мәдениет пен тәрбие жайы ерекше сөз болды. Қоғамның ащы дертіне айналып отырған келеңсіз көріністер, дөрекілік, бейәдеп мінез-құлық сынға алынды. Сондықтан тәрбиенің тамыры сақталғаны жөн.
Расында да, кейінгі уақытта әлеуметтік желілер мен қоғамдық орталарда әдепсіздік, тәрбиесіздік, мәдениетсіздік көріністері жиілеп барады. Мұның астарында отбасындағы тәрбиенің әлсіреуі, рухани тіректің босаңсып бара жатқаны да қылаң береді. Осы түйткілді түзету мақсатымен Ақмола облысында ерекше серпінмен жұмыс істеп келе жатқан құрылым – Қазақстан халқы Ассамблеясы жанындағы аналар кеңесі. Бүгінде оның құрамында 1 200-ге жуық ардақты ана, қоғам белсенділері, ұлт жанашырлары мен зиялы қауым өкілдері бар. Бұл кеңестің мақсаты – отбасы институтын нығайту, ананың қоғамдағы орнын арттыру, ұлттық тәрбие мен мәдениетті дәріптеуге бағытталып отыр.
Аналар кеңесі – жай ғана кеңестік сипаттағы ұйым емес, нақты әлеуметтік жобаларды жүзеге асыратын, қоғамның рухани өзегіне әсер етіп отырған белсенді құрылым. Кеңес жұмысы аясында «Мәдениетті ана – мәдениетті ұлт», «Әже тәрбиесі – ұлылықтың дәні», «Салауатты ана», «Ақ орамал – асыл аналардың аманаты», «Кешкі шай», «Айналайын» секілді жобалар қамтылған. Онда отбасы құндылықтары, ізеттілік пен инабаттылық нәсихатталды.
Мәселен, жыл басынан бері кеңес бастамасымен облыс көлемінде 100-ден астам іс-шара өткізіліп, оған 3 500-ден көп адам қатысты. Бұл – тек бір облыс емес, республикалық маңызға ие көрсеткіш екені даусыз. Мұндай шаралар ұлттық рухты, отбасылық тәрбие мен мәдениетті жүйелі түрде насихаттауға бағытталған.
Кеңестің тағы бір басым бағыты – отбасы институтын экономикалық тұрғыдан да нығайтуға назар аударуы болып отыр. Осы мақсатта көпбалалы және аз қамтылған аналарға кәсіп бастауға мүмкіндік беретін арнайы павильондар ашылды. Онда нәзік жандыларға өз өнімдерін – тағам, қолөнер, тұрмыстық бұйымдарын сату арқылы экономикалық дербестікке қол жеткізуге мүмкіндік беріліпті.
Сондай-ақ жастармен және білім беру мекемелерімен тығыз байланыста жұмыс істейтін қыздар клубтары, әжелер мектебі, ата-аналармен ұлттық тәрбиеге арналған тұрақты кездесулер де осы кеңестің бастамасы. Әсіресе, ұл-қыз тәрбиесіне қатысты жүйелі ұйымдастырылып жүрген кездесулер бүгінгі ұрпақтың бойына рухани жаназық сіңірудің тиімді құралына айналған.
Айрықша атап өтерлігі, жуырда Көкшетау қаласы мен облыстық әкімдік бірлесіп, «Ақ кимешек» шеруін өткізді. Бұл шара қазақ әйелінің дәстүрлі киімін ұлықтап қана қоймай, ұлттық болмыс пен этникалық ерекшелікті сақтауға бағытталған ауқымды мәдени оқиға болды. Іс-шара Қазақстан рекордтар кітабына еніп, көпшілік көңілінен шықты.
Аналар кеңесі өз жұмысын жүйелі жүргізу үшін жергілікті және республикалық ұйымдармен ауқымды ынтымақтастық желісін орнатып отыр. Кеңес төрайымының айтуынша, бұл әйелдердің түрлі мәселені бірлесіп шешуіне мүмкіндік берген.
– Жақында кеңес пен «AMANAT» партиясының Әйелдер қанаты, Әйелдер күші альянсы арасында үшжақты меморандум жасалған еді. Бұл құжат аналар мен әйелдердің құқықтық, әлеуметтік және рухани мәселелерін бірлесіп шешуге бағытталған нақты қадам болды. Сонымен қатар кеңес «Белсенді ұзақ өмір сүру» орталығымен, «Зерделі ұрпақ», «Сенімен болашақ», «Ана үйі» секілді қоғамдық бірлестіктермен, облыстық іскер әйелдер қауымдастығымен, мемлекеттік мекемелермен тығыз қарым-қатынас орнатып отыр. Бұл ынтымақтастықтың нәтижесінде қоғамның осал топтарына көмек көрсету, ұлттық тәрбие мен отбасылық құндылықтарды насихаттау бағытында ауқымды жұмыстар атқарылуда, – дейді Ақмола облысы аналар кеңесінің төрайымы Айнұр Жахина.
Кеңес ұйымдастырған «Ақ тілек: 30 жұпқа бақыт сыйлау», «Отбасы – мейірім мекені» форумдары аясында жастарға бата беріліп, өнегелі аналар «Ел анасы», «Батыл ана», «Мейірімді ана» секілді аталымдармен марапатталды. Бұл – ұрпақ санасына ананың қадірі мен тәрбиелік рөлін сіңірудің заманауи әрі әсерлі әдісі екені сөзсіз.
Ұлтты ұлт ететін оның мәдениеті, әдебі мен тәрбиесі екені рас. Бұл қасиеттер жойылса, ұлттың болашағы да бұлдыр тартары хақ. Сондықтан қоғам үшін отбасындағы тәрбие, әсіресе, ананың рухани миссиясы бәрінен биік тұруға тиіс. Бұл орайда Ақмола облысындағы аналар кеңесінің бастамалары – өнегелі істердің айқын үлгісі болмақ.
Абзал АЛПЫСБАЙҰЛЫ,
Ақмола облысы
