Әсіресе, өңірдің инженерлік инфрақұрылымын жаңарту, халықты сапалы ауызсумен, елді мекендерді газбен қамтамасыз ету және баспана мәселесі негізгі басымдық саналады.
Бүгінде облыс бойынша сумен жабдықтау және су бұру жүйелерін жаңғырту мақсатында нақты жұмыстар атқарылуда. Қала мен ауыл халқын сапалы ауызсумен қамтамасыз ету үшін құбыр желілері тартылып, ескі жүйелер жаңартылып жатыр. Бұл бағытта республикалық және жергілікті бюджет есебінен қаражат бөлініп, нәтижесінде 2025 жылға дейін орталықтандырылған сумен жабдықтау көрсеткішін 100%-ға жеткізу көзделіп отыр.
Облыс әкімі Асхат Шахаровтың есебінше, биыл өңірде 1 300-ден астам тұрғыны бар 4 ауыл сапалы ауызсумен қамтамасыз етілді. Жыл соңына дейін 2 мыңға жуық тұрғыны бар 6 елді мекенді орталықтандырылған ауызсумен жабдықтау жұмыстары аяқталады. Сонымен қатар өңірде су қорларын ұтымды пайдалану және цифрлық технологияларды енгізу, суды үнемдеу мәдениетін қалыптастыру бойынша жұмыстар қолға алынған. Ресми ақпарат көздеріндегі деректерге сәйкес, аймақта барлығы 206 гидротехникалық құрылыс бар. Соның ішінде, 10-ы – республикалық меншікте, 174-і – коммуналдық, 22-сі – жекеменшікке тиесілі. Коммуналдық меншіктегі нысандардың ішінде екі бөгет күрделі жөндеуден өтіп, былтырғы тасқыннан кейін үш бөгет қалпына келтірілген. Табиғи ресурстар және табиғат пайдалануды реттеу басқармасының мәліметінше, бекітілген Жол картасы мен су үнемдеудің үлгілік жоспары аясында суармалы жерлерде заманауи су үнемдеу технология-ларын енгізуге ерекше назар аударылып отыр. Қазақстан Республикасының жаңа Су кодексіне сәйкес, өңірде өнеркәсіп пен тұрғын үй-коммуналдық шаруашылықта қайталама және айналымдық сумен жабдықтауды кезең-кезеңімен енгізуді көздейтін су үнемдеу жоспары әзірленді.
Сондай-ақ биыл 9 мыңға жуық тұрғыны бар 22 елді мекен газбен қамтамасыз етілді, жыл соңына дейін тағы 6 ауылға көгілдір отын жеткізіледі деп жоспарланған. Қазір облыстың 90%-дан астамы көгілдір отынмен қамтылған. Жақын жылдары шалғай ауылдарға газ жеткізу көзделген. Облыс әкімі Асхат Шахаров халықты тұрғын үймен қамтамасыз етуге айрықша мән беріп отыр. Оның айтуынша, бүгінде 745 мың шаршы метр тұрғын үй іске қосылды.
«Үкіметпен бекітілген 1 млн шаршы метр тұрғын үйді іске қосу жоспарын толықтай орындаймыз. Қазіргі таңда 745 мың шаршы метр тұрғын үй іске қосылды. Бұдан бөлек, кезекте тұрған 419 отбасын биыл тұрғын үймен қамтамасыз еттік, жыл соңына дейін тағы 1 063 отбасын баспанамен қамтамасыз ету жоспарда», – дейді өңір басшысы.
Аймақта қауіпсіз орта қалыптастыру да назардан тыс қалып жатқан жоқ. Қазір күні облыс аумағында 19 600-ден астам бейнебақылау камерасы Жедел басқару орталығына қосылған. Оның ішінде, 834 камера жасанды интеллект жүйесімен жабдықталған. Жалпы, өңірде «Заң мен тәртіп» қағидасын жүзеге асыру және тұрғындар арасында кеңінен насихаттау мақсатында тиісті жұмыстар атқарылуда.
Тілек ҚАБЫЛ
