«Биылғы жылы барлығы 8 000 мемлекеттік грант бөлінді. Оның ішінде 800 орын жергілікті шағын және орта бизнес субъектілерінің сұранысы негізінде қарастырылған. Бұл өңірлік кәсіпорындардың қажеттілігіне сай мамандар даярлау қажеттігін көрсетеді», – деді Сарсен Құранбек.
Биыл – Жұмысшы мамандықтар жылы ретінде белгіленген. Осыған орай білікті жұмысшы кадрлар даярлау бағытындағы мемлекеттік тапсырыс көлемі 29,2%-ға артқан. Гранттар орналастырылатын 26 колледждің тізімі арнайы құрылған комиссия шешімімен бекітілген. Құжат қабылдау 25 маусымнан басталды.
Мемлекеттік грант иегерлері тегін оқумен және алғашқы семестрде бірреттік ыстық тамақпен қамтылады. Одан бөлек, 32 000 – 47 000 теңге аралығында стипендия (білім үлгеріміне байланысты) алады.
Шымкент қаласы әкімі орынбасарының айтуынша, биыл мемлекеттік гранттарды бөлу процесі Ұлттық білім беру деректер базасы (ҰБДБ) арқылы жүзеге асады. Бұған дейін бұл жұмыс SmartNation және Platonus платформалары арқылы жүргізілген болатын. «Абитуриенттер арасында гранттарды бөлу тамыз айында өтеді. Нәтижелер қалалық білім басқармасының ресми сайтында жарияланады», – деді ол.
Спикер мемлекеттік білім беру тапсырысын ұлғайту жастардың білім алуға қолжетімділігін арттырып, еңбек нарығының сұранысына сай мамандарды дайындау жолындағы маңызды қадам екенін айтады. Бұл бастама жастар арасында техникалық және жұмысшы мамандықтарына деген қызығушылықты арттырып, қаланың экономикалық дамуына серпін береді.
Назгүл НАЗАРБЕК,
Шымкент қаласы
