АҚШ президенті Дональд Трамп Украинаға тұрақты әскер жібермей, оның орнына америкалық жеке әскери компанияларды тартуды қарастыруда. The Telegraph дерегінше, олар елде база мен бекіністер құрып, АҚШ мүдделерін қорғаумен айналысады.
Бұл бастама Мәскеуге «егер бұндай компанияларға соққы жасалса, ол АҚШ-тың тікелей жауабына себеп болады» деген ескерту ретінде қабылдануы мүмкін. Сонымен қатар, мұндай тәсіл АҚШ қоғамындағы «сыртқы соғысқа араласуға» қарсы көңіл күйді де бәсеңдетуі ықтимал.
Жоспар қазір Еуропадағы одақтастармен бірлесіп талқылануда. Ұсыныстар қатарында Украина мен Ресей арасында буферлік аймақ құру, 30 мыңға жуық еуропалық сарбазды орналастыру, украин әуежайларын қайта ашу үшін әуе кеңістігін бақылау және Қара теңізде Түркия жетекшілік ететін арнайы топ құру бар.
АҚШ өз әскерін жібермейтінін нақтылап отыр. Бірақ Вашингтон логистикалық көмек, қару-жарақ жеткізу (Patriot, HIMARS, ERAM жүйелері) және Еуропада жетіспей жатқан спутниктік барлауды қамтамасыз етуге уәде берді.
