Quartz сайтының материалына сүйенген Aikyn.kz , жұмыссыздықтың күшеюінің себептерін түсіндіреді.
Федералды қаржыландырудың қысқаруынан зардап шеккен коммерциялық емес ұйымдар да қиындықтарға тап болды. Фото content.techgig.com сайтынан алынды
АҚШ-тағы жұмыс орындарын қысқарту бір жылда 50%-ға жуық өскен. Ал кейбір салаларда бұдан да көп болған. Қысқартулар көп болған салалар қатарында қызмет көрсету, бөлшек сауда мен технологиялық компаниялар бар.
Challenger, Gray & Christmas кадр агенттігінің бейсенбі күні (5 маусым) таңертең жариялаған жаңа деректеріне сәйкес, АҚШ жұмыс берушілері мамыр айында 100 мыңға жуық жұмыс орнын қысқартатынын мәлімдеген. Бұл өткен жылдың дәл осы айымен салыстырғанда 47%-ға көп.
Сәуір айымен салыстырғанда аздаған төмендеу болғанымен, жылдық өсімнің 50%-ға жуықтауы жұмыстан қысқартулардың жылдам күшейіп келе жатқанын көрсетеді.
«Кедендік тарифтер, қаржыландырудың қысқаруы, тұтынушылық шығындар және жалпы экономикалық пессимизм компаниялардың еңбек ресурстарына үлкен қысым жасауда. Компаниялар шығындарын азайтып, жұмысқа қабылдауды баяулатып, жұмыстан босату туралы хабарламалар таратуда», – дейді аға вице-президент Эндрю Челленджер.
Жалпы алғанда, 2025 жыл соңғы жылдардағы рекордтарды жаңартады деп болжануда. 2025 жылдың алты айының ішінде жұмыс берушілер 700 мыңға жуық жұмыс орнын қысқартатынын жариялады. Бұл өткен жылмен салыстырғанда 80%-ға артық және 2024 жылғы жалпы қысқартулардан небәрі 65 мыңға аз.
2025 жылдың алты айында 700 мыңға жуық жұмыс орны қысқарады. Фото parentspartner.com сайтынан алынды
Мамыр айында қызмет көрсету секторы қысқартулар бойынша көш бастаған. Бұл салада 22 000-нан астам қызметкер жұмыстан босатылды. Бұл көрсеткіш 2020 жылғы мамырдан бергі ең жоғарғы көрсеткіш.
Одан кейін бөлшек сауда орындары. Бұл жерде 11 483 жұмыстан босату жағдайы тіркеліп, жыл басынан бері қысқартулар санын 75 000-нан асырды. Бұл 2024 жылмен салыстырғанда 274%-ға артық.
Федералды қаржыландырудың қысқаруынан зардап шеккен коммерциялық емес ұйымдар да қиындықтарға тап болды. Бұл сектордағы қысқартулар өткен жылмен салыстырғанда 504%-ға артқан.
Мемлекеттік сектордағы қысқартулар көлемі ең ауқымды болып отыр. 284 000-нан астам қысқарту Илон Масктің Мемлекеттік басқару тиімділігі департаменті (DOGE) арқылы тікелей немесе жанама түрде іске асырылған. Бұл Трамп әкімшілігінің федералды еңбек ресурстарын жаппай қысқартуға бағытталған бастамасының нәтижесі.
TrueUp.io сайтының деректеріне сәйкес, мамыр айында технология саласындағы жұмыстан босатулар күрт өсіп, 24 467 қызметкер жұмыстан босатылған. Олардың ішінде Panasonic, Microsoft, Walmart және OpenText сияқты ірі компаниялар бар. Challenger деректеріне сүйенсек, технологиялық сектор 2025 жылы мемлекеттік сектор мен бөлшек саудадан кейінгі үшінші орында тұр. Осы салада жыл басынан бері 75 000-ға жуық адам жұмыстан шығарылды. Бұл өткен жылмен салыстырғанда 35%-ға артық.
Бейсенбі күні Procter & Gamble келесі екі жыл ішінде 7000 кеңсе қызметкерін қысқартатынын жариялады. Бұл шешім компанияның тиімсіз санаттар мен аймақтардан шығуға деген стратегиясының бір бөлігі. Бұл қысқартулар бірден жүзеге аспайды. Дегенмен олар кеңсе қызметкерлеріне қатысты қысқартулардың жалғасып жатқанын көрсетеді.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.
