eGov Mobile мобильді қосымшасында отбасының әл-ауқатын бағалауға арналған жаңа сервис іске қосылды, деп хабарлайды Еңбек және халықты әлеуметтік қорғау министрлігіне сілтеме жасаған astana24.com.
Ведомствоның мәліметінше, жаңа сервис 2027 жылғы 1 қаңтардан бастап кейбір мемлекеттік көмектерді отбасының нақты жағдайы мен мұқтаждығына қарай көрсету тәртібіне көшу аясында іске қосылып отыр.
"Калькулятор арқылы азаматтар отбасының әл-ауқатын бағалау талаптарымен танысып, отбасының саламаттылық деңгейін анықтай алады.
Бұл ретте отбасының табысы мен мүлкі ғана емес, отбасы құрамы, балалардың, қарт адамдардың және мүгедектігі бар адамдардың болуы сияқты әлеуметтік жағдайлар да ескеріледі", – делінген хабарламада.
Бағалау алты бағыт бойынша 59-дан астам көрсеткішке сүйенеді.
"Айта кетерлігі, есеп адамның өзі енгізген мәліметтер негізінде жүргізіледі және тек ақпараттық сипатқа ие. Яғни калькулятордың нәтижесі әлеуметтік төлем тағайындау немесе оны тоқтату туралы шешім болып саналмайды", – делінген хабарламада.
Посмотреть эту публикацию в Instagram
Публикация от ҚР Еңбек және халықты әлеуметтік қорғау министрлігі (@enbekgovkz)
Естеріңізге сала кетейік, 2027 жылғы 1 қаңтардан бастап Қазақстанда әлеуметтік жәрдемақы тағайындау тәртібі өзгереді. Бұрын баланың тууы, көпбалалы болу немесе өзге де әлеуметтік мәртебеге байланысты төлемдер автоматты түрде берілсе, енді мемлекет отбасының нақты материалдық жағдайы мен мұқтаждық деңгейін ескеретін болады. Өзгеріс жәрдемақының 14 түріне қатысты.
Ал Қазақстандағы отбасылардың әл-ауқат деңгейі бес санат бойынша анықталады.
Сондай-ақ Еңбек министрлігі кейбір тұрғындардың әлеуметтік көмекке мұқтаж болмағандықтан, төлемдерден өздігінен бас тарта бастағанын мәлімдеген болатын.
