Қызылордада қала инфрақұрылымын жаңғырту жұмыстары биыл жаңа қарқын алды. Жолдарды жөндеу, көлік қатынасын жақсарту, инженерлік желілерді жаңарту және қоғамдық кеңістіктерді дамыту бағытындағы жобалар бір-бірімен сабақтасып, қаланың әр бөлігін қамтып отыр. Негізгі мақсат – көлік қозғалысын жеңілдетіп қана қоймай, тұрғындар үшін қауіпсіз әрі қолайлы қалалық орта қалыптастыру, деп хабарлады Қызылорда әкімдігі.
Осы бағыттағы жұмыстардың ауқымын жол құрылысы айқын көрсетеді. Биыл қалада 38 млрд теңгеге 23 жоба жүзеге асырылып, 71 көшедегі 71,1 шақырым жолға күрделі жөндеу және қайта жаңғырту жүргізілуде. Сонымен бірге қаланың шеткі аумақтарындағы жол сапасын жақсартуға да басымдық беріліп, 65 көшеге асфальт төселіп, 54 көшеге қиыршық тас төселді.
Жолдарды жаңартумен қатар, қаладағы көлік ағынын қайта ұйымдастыруға мүмкіндік беретін ірі нысандардың құрылысы жүріп жатыр. Соның бірі – Жанқожа батыр көшесіндегі теміржол өткелін жаңғырту жобасы. Құны 4,6 млрд теңге болатын жоба аясында екі жолақты өткел, көпір, тіреу қабырғалары және жаяу жүргіншілер жолы салынады. Ал Сырдария арқылы Иса Тоқтыбаев көшесінен өтетін жаңа автомобиль көпірі қаланың сол жағалауын негізгі бөлікпен байланыстыратын маңызды көлік нысанына айналмақ.
Қаланың көлік қаңқасы жаңарған сайын оның инженерлік жүйелерін де соған сай дамыту қажеттігі туындайды. Осыған байланысты су шаруашылығы нысандарын жаңғырту жұмыстары қатар жүргізілуде. Ұзындығы 9 шақырым болатын Қызылжарма каналын жаңғырту жобасы аяқталуға жақын. Бұған қоса, су және кәріз желілерін жаңарту бойынша бірнеше жоба іске асырылып, биологиялық тазарту станциясын жаңғырту жұмыстары жүргізілуде.
Инфрақұрылымның жаңаруы тұрғындардың күнделікті өміріне тікелей әсер ететін қоғамдық кеңістіктердің өзгеруімен де жалғасып отыр. Президент саябағында жол және абаттандыру жұмыстары жүргізіліп, саябақты Астана шағын ауданымен байланыстыратын Сырдария үстіндегі жаяу жүргіншілер көпірінің құрылысы қолға алынған. Жоба аясында жаяу жүргіншілерге арналған жолмен қатар веложол қарастырылған.
Осылайша, Қызылордадағы инфрақұрылымдық өзгерістер тек жекелеген көшелерді жөндеумен шектелмей, қаланың көлік, инженерлік және қоғамдық кеңістіктерін өзара байланысты түрде жаңартуға бағытталып отыр. Бір жағынан жолдар мен көпірлер көлік қатынасын жеңілдетсе, екінші жағынан су жүйелері мен абаттандырылған кеңістіктер қаланың күнделікті өмір сүру сапасына әсер ететін ортаны қалыптастырады. Бұл жұмыстар Қызылорданың бірқатар мәселесін шешумен қатар, қаланың алдағы даму мүмкіндіктеріне де негіз қалайды.
