Жұлдыздар салтанатты шарадан кейін Нью-Йоркте гүлдер мен конструкцияларды өртеп жіберді, себебі рәсімнің бөлшектері мен бағалы естелік заттар алыпсатарлар мен жанкүйерлердің қолына түспеуге тиіс, деп жазды The Blast-қа сілтеме жасаған astana24.com.
Әнші Тейлор Свифт пен америкалық футбол ойыншысы Трэвис Келси 3 шілдеде "Мэдисон-сквер-гарден" аренасында өткен дүркіреген тойының құпияларын қорғау үшін қатаң шараларға барды. Daily Mail басылымының мәліметі бойынша, жұп құны миллиондаған доллар болатын гүл композициялары мен сәндік элементтерді жоюды тапсырған. Барлық материал Нью-Йорктен Пенсильванияға шығарылып, сол жерде өртелді.
Басылым инсайдерінің сөзінше, бұл қадамды жас жұбайлар декор элементтерін кейін аукциондарда қайта сату мақсатында әлдебіреулер ұрлап әкетпеуі үшін жасаған. Тойдағы арена тірі және жасанды ағаштары бар тылсым орман ретінде безендірілді. Әншінің өзі дизайнды жасауға тікелей қатысып, техникалық қызметшілерге атқарған жұмысы үшін алғыс білдірді.
Page Six ақпараты бойынша, дайындық барысында кейбір идеялардан бас тартылған. 7 миллион доллар тұратын екі қабатты карусель қымбаттығына байланысты карнавалдық ойындары бар шатырмен алмастырылды, ал қонақтардың қауіпсіздігін қамтамасыз ету мақсатында жасанды тоған алып тасталды.
Іс-шараға мыңға жуық адам қатысты. Күйеу жігіттің шафері болып Джейсон Келси, қалыңдықтың шафері болып оның ағасы Остин Свифт қатысты, ал рәсімді жүргізуші ретінде комик Адам Сэндлер өнер көрсетті. Ақпараттың сыртқа таралуынан қорғану үшін қонақтарға телефон қолдануға тыйым салынды. Келси New Heights подкастында камералардың болмауы шақырылған қонақтарға еркін демалуға көмектескенін атап өтті. Жұп тойдан видеожазбаларды да жариялауды жоспарлап отырған жоқ.