Таиланд үкіметі 2027 жылдың басында туристік алым енгізуді жоспарлап отыр, оны сол елге баратын барлық шетел азаматы төлеуге тиіс, деп хабарлайды astana24.com ТАСС-қа сілтеме жасап.
Агенттіктің Bangkok Post газетінің деректеріне сүйене отырып хабарлауынша, Таиланд үкіметі 2027 жылдың бірінші тоқсанында шетел азаматтарынан 450 бат көлемінде туристік алым жинай бастайды.
Алғашқы кезеңде бұл шешім әуе көлігімен келетін саяхатшыларға қатысты болатыны атап өтілген. Бұл шара бюджетке жыл сайын шамамен 8 млрд бат (239 млн доллар) кіріс әкеледі деп күтілуде.
"Түскен қаражаттың бір бөлігі саяхатшыларды медициналық сақтандыруға бағытталады, бұл осы мақсаттарға жыл сайын бөлінетін шамамен 7 млрд бат (209 млн доллар) мемлекеттік қаражатты үнемдеуге мүмкіндік береді. Қалған қаражат туристік инфрақұрылымды дамыту және жаңғырту арнайы қорына түседі", – делінген хабарламада.
Егер Таиланд бұл алымды енгізетін болса, қазақстандық туристер 6 мың теңге мөлшерінде алым төлеуі мүмкін.